Mətbuat Şurasının Şikayətlər üzrə Komissiyasının iclası keçirilib
Fevralın 16-da Azərbaycan Mətbuat Şurasının Şikayətlər ürə Komissiyasının növbəti iclası keçirilib. İclası giriş sözü ilə açan komissiya sədri, Bakı Dövlət Universitetinin Jurnalistika fakültəsinin dekanı Vüqar Zifəroğlu gündəlikdəki məsələlər barədə məlumat verib.
Toplantıda müxtəlif vətəndaş qrupları tərəfindən ünvanlanmış 9 şikayət nəzərdən keçirilib. Bunlar ilə əlaqədar Şuranın Katibliyi tərəfindən verilmiş məlumatda bildirilib ki, həmin şikayətlərdən 8-nə dair müvafiq tədbirlər görülüb. Bunlardan 5-i ilə bağlı şikayətçi tərəfə aidiyyatı qurumlara müraciət ünvanlamaq tövsiyə edilib. 3 şikayət üzrə isə tərəflər arasında anlaşmanın əldə edilməsi təmin olunub. Komissiya verilmiş məlumatı məqbul qiymətləndirib.
Komissiya üzvləri, eyni zamanda, müxtəlif şikayətlərin müzakirəsi zamanı bəzi media subyektlərində bir şəxsi aşkar şəkildə hədəfə alma meyillərinin mövcudluğunu və onların jurnalist peşəkarlığına zidd forma və metodlar, tənqid hədəfinə münasibətdə aşağılayıcı elementlər ilə nəzərə çarpdığını müəyyənləşdiriblər. Onlar media müstəvisindəki bu sayaq sui-istifadələrə qarşı sərt tədbirlərin görülməsinin vacibliyini vurğulayıblar. Çünki belə təmayüllər media müstəvisindən tam kənardır. Məsələnin Mətbuat Şurasının İdarə Heyətinin iclasında müzakirəyə çıxarılması məqbul qiymətləndirilib.
